ERT TÚ OKKARA NÝGGJA RØDD Á SOSIALU MIÐLUNUM?
Dagfesting | 15. oktober 2026
Brennur tú fyri góðum søgum, kreativum innihaldi og sosialum miðlum? Dugir tú at fanga tað serliga við Føroyum – og fáa allan heimin at síggja tað? So ert tú kanska tann, vit leita eftir!
Vit á Visit Faroe Islands leita eftir einum kreativum og ágrýtnum starvsfelaga, sum hevur hug at taka ábyrgd av okkara sosialu miðlum og vera við til at siga heiminum frá øllum tí fantastiska, sum Føroyar hava at bjóða.
Við Heim-strategiini sum grundarlagi arbeiða vit við at menna og marknaðarføra Føroyar sum ferðafólkaland fram móti 2030. Og her fært tú ein týðandi leiklut.
Hvat fert tú at gera?
Tú verður tann, sum heldur lív í okkara sosialu miðlum – frá fyrsta hugskoti til lidna uppslagið.
Tú fert millum annað at:
- Skapa, skriva og samskipa spennandi innihald til okkara sosialu miðlar
- Finna og fortelja tær góðu søgurnar um Føroyar og føroyingar
- Hugsa kreativt, men eisini strategiskt, so okkara innihald røkkur teimum røttu fólkunum
- Vera við til at menna innihald til visitfaroeislands.com
- Taka lut í øðrum marknaðarføringsuppgávum
Eingin dagur er heilt eins, og tú fært bæði frælsi og ábyrgd at seta tín dám á okkara samskifti við umheimin.
Hvør ert tú?
Vit ímynda okkum, at tú ert ein persónur, sum fær hugskot, tá tú minst væntar tað, hevur eyga fyri góðum innihaldi og veit, hvat riggar á teimum ymisku sosialu miðlunum.
Vit leita eftir tær, sum:
- Hevur royndir við at arbeiða við innihaldi á ymsu pallunum og hevur góð úrslit at vísa á innan øki
- Hevur hægri útbúgving innan journalistikk, marknaðarføring, sosialar miðlar ella líknandi
- Dugir sera væl at skriva og samskifta – bæði á føroyskum og enskum. Flótandi enskt er eitt krav
- Ert kreativ/ur, framsøkin og brennur fyri at fortelja góðar søgur við orðum og myndum
- Dugir bæði at hugsa stóru tankarnar og fáa hugskotini út í lívið
- Ert málrættað/ur og hevur eyga fyri, hvat fangar áhugan hjá fólki
- Trívist við ferð á og dugir at hava fleiri bóltar í luftini
- Ert jalig/ur, opin og hevur lætt við at samstarva við ymisk fólk
Hvat fært tú afturfyri?
Fyrst og fremst eitt starv, har tú sleppur at arbeiða við einum av heimsins vakrastu ferðamálum (ja, vit eru kanska eitt sindur partísk!).
Harumframt bjóða vit tær:
- Eitt spennandi og fjølbroytt starv við nógvum samskifti við fólk bæði í Føroyum og uttanlands
- Møguleika at seta tín egna dám á okkara arbeiði og vera við til at menna okkara sosialu miðlar
- Eitt fakliga spennandi umhvørvi við plássi fyri góðum hugskotum
- Eitt gott og ljóst arbeiðspláss í hjartanum av gomlu Havnini
- 10 góðar starvsfelagar, sum saman við føroysku ferðavinnuni arbeiða fyri at seta Føroyar á heimskortið
Vit eru eitt lítið toymi, har vit hjálpa hvørjum øðrum, hava nógvar ymiskar uppgávur – og har tað ongantíð er langt frá einum góðum hugskoti til at royna tað í verki.
Tað praktiska
Starvið er tíðaravmarkað fram til 31. januar 2028, men møguleiki er fyri, at tað kann gerast fast, um játtanin loyvir tí.
Løn er sambært avvarðandi sáttmála.
Ljóðar hetta sum nakað fyri teg?
So vilja vit fegin hoyra frá tær.
Send okkum umsókn og viðkomandi skjøl til info@visitfaroeislands.com ella til:
Visit Faroe Islands
Att: Guðrið Højgaard
Gongin 9
100 Tórshavn
Umsóknarfreistin er 25. oktober 2026.
Allar umsóknir verða viðgjørdar í trúnaði, og starvið verður sett skjótast til ber.
Vilt tú vita meira? Tú ert vælkomin at seta teg í samband við Guðrið Højgaard, stjóra, á telefon 55 61 35 ella við telduposti til guri@visitfaroeislands.com.